2
min read
A- A+
Pročitano

Ukusi i mirisi Vladimirove kuhinje: Kulinarstvo je umjetnost koja ispunjava sva čula (FOTO)

21/08/2019 - 13:32
Autor:Violeta Rovčanin
870 pregleda

Da žene nisu jedine koje se odlično snalaze u kuhinji, već da su muškarci podjednako vješti pa možda čak i bolji, pokazuje primjer Mojkovčanina Vladimira Fuštića. On je nedavno na Instagamu pokrenuo food blog „Alafulekitchen“, gdje sa ljubiteljima odličnih zalogaja dijeli fotografije hrane koju sprema kao i recepte za njihovu pripremu. Ovoga puta, vodimo vas u kuhinju u kojoj je spremanje hrane prava umjetnost.

Foto: Privatna arhiva

Foto: Privatna arhiva

„Volim provoditi vrijeme u kuhinji, osjetiti arome namirnica i kasnije sve to degustirati. Ideja da napravim blog na Instagramu je potekla od želje da sa drugima podijelim tu ljubav, ali i da sve što spremam ostane zabilježeno, da se mogu prisjetiti vremena provedenog u kuhinji“, kaže Vladimir za FOS.

fOTO
Foto: Privatna arhiva

Ne krije da voli da eksperimentiše kada je hrana u pitanju, pa često, pored jednostavnih i klasičnih jela,  možete vidjeti i neke nesvakidašnje specijalitete i spoj naizgled nespojivih namirnica.

„Na mome blogu ljudi mogu vidjeti razna jela, slana i slatka, nekada i neobična kao pileći file u sosu od pomorandži. To nisu zahtjevna jela, lako se pripremaju tako da to može biti, pored lijepog izgleda, dodatni podsticaj da i oni naprave isto. Blog sam odnedavno pokrenuo, tako da se na njemu nalazi oko 30 jela, mada sam ih mnogo više napravio“, priča naš sagovornik.

Foto: Privatna arhiva
Foto: Privatna arhiva

Ovaj novinar, slikar i veliki ljubitelj umjetnosti smatra da ljubav prema kulinarstvu nije slučajna jer je i samo spajanje namirnica i dekorisanje hrane jedna vrsta umjetnosti.

„Kulinarstvo je umjetnost, pravite mala umjetnička djela koja ispunjavaju sva vaša čula a uvijek možete da eksperimentišete i isprobavate kombinacije raznih sastojaka. A kombinacije u kuhinji su beskonačne, tako da ne može predstavljati zamor. Prve kulinarske korake sam učio od majke ali danas nije teško spremati jela jer postupak možete i pratiti na brojnim video tutorijalima i konstantno učiti.“

Foto: Privatna arhiva
Foto: Privatna arhiva

Kada uđe u kuhinju, tada vrijeme stane. Spreman je da se maksimalno posveti tome što radi i da stvori pravu magiju na tanjiru.

„Volim da spremam ono što volim da jedem: ribu, povrće, peciva, kolače... Ovladao sam pripremom jela od tijesta za koja mi mnogi kažu da su najteža za pripremu. Priznajem da mi nije teško tako da često pravim moja razna peciva i sviđa mi se miris tijesta, nekako me vraća u djetinjstvo. Što se tiče vremena koje provodim u kuhinji ne mogu precizno odgovoriti. Brzo živimo, dosta radimo tako da je nemoguće svakodnevno spremati jela ali vikendom sam redovno u kuhinji. Trenutno sam kod roditelja u Mojkovcu i mogu vam otkriti da svaki dan pripremam po tri jela“, priča Vladimir za FOS i dodaje:

„Recimo pašta sa orasima, gorgonzolom i pršutom je fenomenalna. Kisjele paprike se savršeno slažu sa kulenom i bijelim lukom na pici. Maline, kisjela pavlaka i keks čine smjesu za prelijepe bombice prelivene čokoladom. Oduševljavaju me cookies za kojima su Amerikanci ludi i stalno traže bolji recept. Mislim da sam to jelo najčešće pripremao.“

Iako smo, kaže, društvo sa brojnim predrasudama, pohvale za Vladimirovu kuhinju su sve učestalije.

„Pohvale stižu većinom od žena ali i od muškaraca, posebno kolega koji mi uvijek traže da spremam za njih. Čak organizujem i privatna takmičenja gdje su uglavnom muškarci članovi žirija. Tako da sve više Crnogoraca poštuje muškarce u kuhinji. U profesionalnom smislu mislim da su muškarci bolji kuvari, ali priznaćete da se najviše obradujemo majkinoj i bakinoj kuhinji.“

Na blogu objavljuje samo fotografije jela upravo zbog toga da bi podstakao ljude da sami traže recept a potom i podijele utiske o spremljenom jelu.

Što se tiče kulinarstva, ima velike planove. Nada se da će ih nekad i ostvariti.

„Nastaviću da kuvam jer to volim i volio bih da jednog dana otvorim restoran. I dalje ću objavljivati jela a možda budem pravio i video tutorijale. Platforme za distribuciju postoje i vrlo su popularne tako da bi taj korak bio stepenica više za „Alafulekitchen“, zaključuje Vladimir za FOS.

is_sponsored
0
FOTO PRICHA
Off
slika_video_zamjena
Off

Komentari